Policia e Durrësit ka arrestuar autorin i cili plagosi sot me armë zjarri dy persona në Durrës.
Në këtë ngjarje mbetën të plagosur babë e bir H. B., 63 vjeç dhe M. B., 39 vjeç, të cilët u transportuan në spital dhe janë jashtë rrezikut për jetën.
Pas dy orësh ndjeke nga policia është vënë në pranga autori i identifikuar si Altin Llulla, 39 vjeç. Në cilësinë e provës materiale policia sekuestroi armën e krimit pistoletë dhe automjetin e autorit.
Njoftimi i policisë
Kapet pas dy orë ndjekjeje nga shërbimet e Policisë së Durrësit, autori i dyshuar i plagosjes së dyfishtë me armë zjarri.
Policia e Durrësit zbardhi dhe dokumentoi në kohë rekord, ngjarjen e ndodhur më parë, ku mbetën të plagosur me armë zjarri babë e bir.
Vihet në pranga autori kryesor i dyshuar për plagosjen e dy shtetasve, falë dhe bashkëpunimit me qytetarët.
Policia gjeti dhe sekuestroi armën e krimit pistoletë dhe automjetin e autorit.
Policia e Durrësit, menjëherë pas njoftimit të marrë për ngjarjen e ndodhur, organizoi punën dhe falë reagimit në kohë dhe veprimeve të shpejta e profesionale bëri të mundur që pas dy orë ndjekjeje dhe kërkimesh, falë edhe mbështetjes së qytetarëve, të kapë dhe vërë në pranga shtetasin A. Ll., 39 vjeç.
Ky shtetas dyshohet se pas një konflikti të çastit, nën efektin e alkoolit ka plagosur me armë zjarri shtetasit H. B., 63 vjeç dhe M. B., 39 vjeç (bab e bir), të cilët ndodhen në spital, nën kujdesin e mjekëve, jashtë rrezikut për jetën.
Materialet do t’i kalojnë Prokurorisë së Rrethit Gjyqësor Durrës, për veprime të mëtejshme./ Opinion.al
