Çështja e dosjeve të anëtarëve që janë pjesë e organeve të larta të drejtësisë, është kthyer sërish në vëmendje.
Sipas Top Channel, që i referohet Autoritetit të Dosjeve nga 294 kandidatë të verifikuar deri më tani, 5 individë kanë rezultuar me dosje.
“Janë verifikuar kandidatët për anëtarë të Këshillit të Lartë Gjyqësor dhe anëtarë të Këshillit të Lartë të Prokurorisë. Nga verifikimi, për 3 persona rezultoi se figurojnë në dokumentacionin e ish-Sigurimit të Shtetit; dy persona si subjekte proceduese ish-gjyqtar dhe ish-prokuror në procese penale politike (NS, FL) dhe një person si bashkëpunëtor (SV)”.
Ndërkohë, televizioni publikon edhe informacionet që Autoriteti i dosjeve disponon për partitë politike, të cilat kanë kërkuar të dhëna për kandidatët e tyre për deputetë.
“Me kërkesë të dy partive politike (Partia për Drejtësi, Integrim dhe Unitet; Aleanca Popullore për Drejtësi), janë verifikuar 285 persona në kuadër të verifikimit të figurës për kandidatët për deputetë në Kuvendin e Shqipërisë, për zgjedhjet e 25 Qershorit. Nga verifikimi, 4 persona figurojnë në dokumentacionin e ish-Sigurimit të Shtetit (XHA, RT, FT, ZG)”.
Duket se bashkëpunëtorë të dikrushëm të sigurimit gjenden edhe në Ministrinë e Brendshme, ku nga 30 persona të verifikuar, individi me inicialet A.Xh, figuron në dokumentacionin e ish-Sigurimit të Shtetit (AXH)”.
Ndërkohë Autoriteti i Dosjeve jep informacion edhe për fushën akademike, ku rezultojnë bahskëpunëtorë të sigurimit në Akademinë e Shkencave dhe në fakultetin ekonomik.
“Me kërkesë nga Akademia e Shkencave janë verifikuar të gjitha kandidaturat në kuadër të verifikimit të figurës përpara emërimeve ose ngritjes në detyrë. Dy persona figurojnë në dokumentacionin e ish-Sigurimit të Shtetit (GjSh, IM). Nga Fakulteti Ekonomik i Universitetit të Tiranës janë verifikuar 116 persona. Dy persona figurojnë në dokumentacionin e ish-Sigurimit të Shtetit (AM, IK)”.
Numrin më të madh të kërkesave për verifikim e ka Ministria e Europës dhe Punëve të Jashtme.
“Me kërkesë nga MEPJ janë verifikuar 234 persona, nga të cilët 7 persona – (FR), (EM), (LlK), (JSh), (GS), (AA), dhe (AD), – figurojnë në dokumentacionin e ish-Sigurimit të Shtetit”.
Edhe SHISH ka kërkuar verifikim për 45 punonjës të tij, ku ka rezultuar se individët me inciale (KP), (QD) dhe (RM) janë në dokumentacionin e ish-Sigurimit të Shtetit”. Të tjerë pjesëtarë të stafit janë në proces verifikimi.
Autoriteti i dosjeve ka kaluar në skaner edhe 25 persona që kryejnë funksione në pushtetin vendor.
“Rezultoi se (DHS) figuron në dokumentacionin e ish-Sigurimit të Shtetit, po ashtu edhe (ZK)”.
Në Gardën e Republikës, nga 7 persona të kontrolluar, njëri prej tyre ka rezultuar me dosje, ndërsa nga 4 kandidatët për komisioner pranë Avokatit të Popullit, njëri ka dosje, sikurse edhe njëri prej anëtarëve të Këshillit Drejtues të Radio Televizionit Publik Shqiptar, me inicialet PP.
