Detaje të reja janë zbuluar nga ngjarja e rëndë në Tropojë, ku shtetasi Floridan Mulaj qëlloi për vdekje me armë zjarri shtetasin Artur Dauti.
Burime bëjnë me dije se autori me viktimën s’kanë pasur probleme të mëparshme, por u konfliktuan sot në ambientet e një lokali.
Pasi autori dhe viktima janë konfliktuar me njëri tjetrin, Mulaj ka shkuar në shtëpi e ka marrë armën e zjarrit e më pas ka shtënë në drejtim të viktimës disa herë duke e lënë të vdekur në vend.
Sipas informacioneve paraprake nga policia, Flordian Mulaj ka qëlluar Artur Dautin për motive të dobëta.
“Rreth orës 13:40, në një lokal në fshatin Dojan, dyshohet se shtetasi F. M., rreth 35 vjeç, për motive të dobëta, ka qëlluar me armë zjarri shtetasin A. D., rreth 43 vjeç, i cili për pasojë ka ndërruar jetë.
Në drejtim të Tropojës janë nisur forcat operacionale të DVP Kukës, specialistët e Hetimit të Krimeve, dhe dy grupe të Forcës Kombëtare të Sigurisë Njësia Shkodër, për lokalizimin dhe kapjen e autorit.
Ndërkohë, grupi hetimor nën drejtimin e Prokurorisë vijon punën për zbardhjen dhe dokumentimin e plotë ligjor të këtij rasti, si dhe shoqërimin e personave të tjerë të përfshirë në këtë ngjarje”,-njoftoi policia.
