Policia ka vënë në pranga autorin e vrasjes së 82-vjeçarit Paulin Gina në Durrës. 39-vjeçari Fation Janina dyshohet dhe akuzohet se masakroi me thikë dhe çekiç të moshuarin, brenda banesës së këtij të fundit.
Më pas, fshehu armët e krimit në apartamentin e tij, të cilat janë sekuestruar nga Policia.
Ngjarja e rëndë u zbardh mëngjesin e sotëm nga Policia, ndërkohë që krimi u raportua mbrëmjen e djeshme rreth orës 18:50. Ende nuk dihen më shumë detaje rreth dinamikës së vrasjes, ndërsa dyshohet se ka ndodhur për motive të dobëta.
“Shërbimet e Komisariatit të Policisë Durrës, rreth orës 18:50 të datës 30.12.2024, kanë marrë njoftim se në lagjen nr.13, Durrës, ishte gjetur i pajetë në banesë, dyshohej i dëmtuar me mjet prerës, një 82-vjeçar. Menjëherë kanë shkuar në vendngjarje shërbimet e Policisë, grupi hetimor, specialistët për Hetimin e Krimeve të Rënda, Drejtori i DVP Durrës dhe në drejtimin e Prokurorisë kanë vijuar veprimet hetimore për zbardhjen e rrethanave dhe identifikimin e autorit. Nga këqyrja e trupit të 82-vjeçarit P. G., eksperti mjeko-ligjor konstatoi se kishte dëmtime të shumta të shkaktuara me mjet prerës dhe me sende të forta. Në vijim të veprimeve, gjatë kontrollit në banesën e autorit të dyshuar, Policia gjeti dhe sekuestroi në cilësinë e provave materiale 2 thika, 1 çekiç dhe veshjet që dyshohet se ka patur autori gjatë kryerjes së krimit. Mjeti prerës, çekiçi dhe veshjet me njolla gjaku janë dërguar në Institutin e Policisë Shkencore, për ekzaminime të mëtejshme. Materialet u referuan në Prokurori, për veprat penale “Vrasja me dashje” dhe “Mbajtja pa leje e armëve të ftohta“, raportoi Policia më herët.
