Dy të rinj janë arrestuar nga policia e Tiranës pasi kanë grabitur një 23-vjeçar, duke e kërcënuar me e armë, ndërsa dy të tjerë janë shpallur në kërkim.
Dy autorët tashmë të arrestuar i grabitën të riut 1450 euro, një shumë lekësh, aparatin celular dhe biçikletën .
Policia bën me dije se në pranga kanë rënë shtetasit Sebastian Ogici dhe Ruzhdi Thano.
Ogici 19-vjeç , banues në Tiranë, akuzohet për veprat penale “Vjedhja me dhunë”, kryer në bashkëpunim, “Largimi i të burgosurit nga vendi i qëndrimit”, “Mbajtja pa leje dhe prodhimi i armëve, armëve shpërthyese dhe i municionit” dhe “Prodhimi dhe shitja e narkotikëve”;
Ndërsa, Ruzhdi Thano, 23 vjeç, po ashtu banues në Tiranë akuzohet për veprën penale “Vjedhja me dhunë”, kryer në bashkëpunim.
Ndërkohë, në kërkim nga policia janë shpallur shtetasit M. F., 23 vjeç, dhe E. S., 20 vjeç, të dy banues në Tiranë.
Gjatë kontrollit fizik, Sebastian Ogicit iu gjetën dhe iu sekuestruan, një pistoletë, e cila dyshohet se u përdor gjatë vjedhjes dhe një sasi lënde e dyshuar narkotike cannabis sativa.
Ndërkohë, nga hetimet ka rezultuar se ky shtetas ka shkelur masën e sigurisë “Arrest në shtëpi”, të caktuar nga Gjykata, për veprën penale “Vjedhja”, duke dalë jashtë banesës./Opinion.al
