Prej muajsh emigrantë që vijnë nga vendet arabe hyjnë në Shqipëri përmes Greqisë. Ata janë të arratisur nga kampet e refugjatëve dhe e përdorin Shqipërinë si vend transit për të shkuar drejt vendeve të Bashkimit Europian në Perëndim.
Policia njoftoi sot ndalimin e gjashtë emigrantëve të cilët po udhëtonin drejt Tiranës. Një prej tyre ishte një vajzë nga Afganistani e cila ka folur për mediat.
Ajo tregon për udhëtimin e tyre të vështirë. E ndërgjegjshme për paragjykimin që iu bëhet dhe mes lotësh vajza shprehet se kërkon vetëm të shkollohet.
“Vijmë nga Greqia, Korça, Afganistani. Duam të shkojmë në një vend më të mirë, pasi duam të mësojmë… (qan). Ne kemi nevojë për shkollë. Unë jam e re, jam shumë e re. Unë dua të shkollohem. Nuk dua ushqim, nuk dua para. Nuk mund të më kuptoni. Është e vështirë për mua. Ne kemi folur disa herë. Policia na mori, por ne nuk jemi terrorist. Mami im është në Tiranë, unë jam me babin”, tha ajo.
Prej më shumëse një viti, në Shqipëri vepron Agjencia Europiane e Mbrojtjes së Kufijve, FRONTEX, e cila ka instaluar oficerët e saj në vijën kufitare me Greqinë, ndërsa së fundmi caktoi edhe ekspertë në Malin e Zi, për kontrolluar fluksin e emigrantëve që vijnë nga Shqipëria. Mbi 20 mijë shtetas nga Siria, Afganistani dhe të kombësive të tjera janë ndaluar përgjatë këtyre muajve në Shqipëri, ndërsa janë arrestuar dhjetëra persona që i transportonin ata në mënyrë të paligjshme./ Opinion.al
