Kryeministri Edi Rama i ftuar në forumin ‘Atreju’ të organizuar nga partia Fratelli d’Italia, kryetare e së cilës është kryeministrja italiane, Giorgia Meloni, ka folur për marrëveshjen e Shqipërisë me Italinë për emigrantët.
Rama tha se: “Gjykata Kushtetuese e Shqipërisë ka bërë detyrën e saj sepse Kushtetuta e pezullon automatikisht një marrëveshje për ta marrë në shqyrtim para se të ratifikohet në parlament. Është prova që unë nuk kontrolloj gjykatat në Shqipëri”.
Sipas tij, marrëveshja nuk është antikushtetuese dhe beson se Gjykata do ta shqyrtojë para afatit kohor, duke qenë se është një marrëveshje e rëndësishme.
“Jam besimplotë sepse marrëveshja nuk ka asnjë gjë antikushtetuese. Në Mars është afati kohor, por unë besoj se vendimi do të merret shumë më herët, sepse është një marrëveshje shumë e rëndësishme dhe të dyja qeveritë duan të dinë nëse mund të ecin përpara ose jo. Nuk do të pranoj kërkesa të tjera nga vende europiane. Kemi pasur kërkesa të tjera nga vende kushërinj, por kemi thënë jo. Italia nuk është një vend kushëri, por një vëlla, një motër. Ka një diferencë. Nëse ne bëjmë një marrëveshje me një vend si Italia, e bëjmë si pjesë e angazhimit të përbashkët, jo sikur të jemi një vend i jashtëm në të cilin transferohet problemi. Ajo çfarë Italia po bën nuk është transferimi i problemit, por të zgjerojë hapësirën për të menaxhuar këtë çështje teksa merret me problemin”, tha ai.
Pas fjalës së tij, Rama është takuar me Melonin, ku janë parashikuar disa takime bilaterale, shkruajnë mediat italiane.
Para pak ditësh, Gjykata Kushtetuese pezulloi marrëveshjen për emigrantët. Kryetarja e gjykatës, Holta Zaçaj, sqaroi afati i fundit për të thënë fjalën e saj gjykata është më 6 Mars.
