Gledian Llatja është emëruar sot Prefekt i ri i qarkut të Elbasanit. Për prezantimin e tij kanë shkuar në Elbasan, ministri i Brendshëm, Sandër Lleshaj, dhe kryetari i grupit parlamentar, Taulant Balla.
Emri i Llatjes përflitet si një kandidat i mundshëm për Bashkinë e Elbasanit. Një mundësi të tillë nuk e përjashtoi as taulant Balla, i cili u shpreh se, nëse ekziston dëshira e Llatjas, emri i tij do të konsultohet me qytetarët.
Në marrjen e detyrës së re, Gledian Llatja tha se do të përpiqet të plotësojë të gjitha pritshmëritë në drejtimin e institucionit të prefektit.
Ministri Sandër Lleshaj e cilësoi këtë lëvizje të beftë të kryeministrit, si një mundësi të mirë për t’i dhënë një frymë të re Prefekturës së Elbasanit.
Gledian Llatja zëvendëson Maksim Malajn në Prefekturën e Elbasanit.
Gledian Llatja ka lindur në Elbasan dhe është diplomuar për Drejtësi. Ai ka punuar jurist në disa institucione, dhe nga tetori 2017 e deri më tani ka mbajtur detyrën e shefit të Kabinetit pranë Ministrisë së Infrastrukturës dhe Energjisë.
