Vazhdojnë të zhvillohen bisedimet e liderëve të vendeve anëtare të Bashkimit Europian për emërimin e udhëheqësve të institucioneve kryesore.
Diskutimet janë ende në një ngërç të thellë. Përplasja mes Francës dhe Gjermanisë për emrin e kreut të Komisionit duket se është zbutur. Por nga ana tjetër janë rritur mospajtimet nga grupi i vendeve të Vishegradit dhe italisë. Një faktor tjetër që ndikon është përplasja mes grupeve politike që janë të përfaqësuara në parlamentin evropian.
Kancelarja e Gjermanisë, Angela Merkel deklaroi të martën, se të gjithë duhet të bëjnë kompromise gjatë procesit të emërimit të udhëheqësve të rinj të institucioneve të BE-së.
“Të gjithë duhet ta kuptojnë, se duhet të zhvendosen pak nga pozicionet. Pastaj do të ketë një mundësi për të arritur marrëveshje”, tha Merkel.
Diskutimet që kanë filluar të dielën në Bruksel kanë për qëllim të zgjedhin kryetarët për postin e Presidentit të Komisionit, Presidentin e Këshillit, Të Ngarkuarin për Politikë të Jashtme, Presidentin e Parlamentit dhe Presidentin e Bankës Qendrore Evropiane. Disa përfaqësues të vendeve anëtare kanë thënë se një vendim mund të merret gjatë ditës së martë. /Opinion.al
