Miqësorja kundër Katarit ndoshta nuk do të mbahet mend gjatë, pasi ishte thjesht një përgatitore e fituar kundër një rivali inferior, por ndërkohë ka qenë një ndër ndeshjet më të rëndësishme në karrierën e Elseid Hysajt. Mbrojtësi i kombëtares sonë mbajti për herë të parë shiritin e kapitenit në Kombëtare, një vendim surprizë i trajnerit Xhani De Biazi, i cili ka shpërblyer në këtë mënyrë rritjen fantastike të mbrojtësit tonë.
Titullar i spikatur te Napoli, Hysaj ka qenë i shkëlqyer edhe në Kombëtare, duke merituar vlerësimin e De Biazit, ndërkohë që ka vendosur edhe një rekord. Kjo për faktin se në moshën 22-vjeçare është kapiteni më i ri në historinë e Kombëtares shqiptare, duke thyer rekordin e të madhit Loro Boriçi, i cili në moshën 24 vjeç ka qenë kapiten i Shqipërisë.
