Me 7 plumba u qëllua 47-vjeçari Nikola Ikonomi, apo i njohur ndryshe si Laver Tozaj, mbrëmjen e së mërkurës pranë banesës së tij në Selenicë. Ai nuk ka qenë një emër i panjohur për autoritetet, ndërsa ishte i dënuar më parë për trafik droge.
47-vjeçari ka marrë pesë plumba në pjesën e kraharorit dhe dy në kokë. Rruga ku u vra Laver Tozaj nuk kishte ndriçim. Pista kryesore e hetimit mbetet vrasja për prishje të pazareve të drogës. Ndërkohë, familjarët kanë deklaruar se 47-vjeçari s’ka pasur konflikte në fshat. Burime konfidenciale raportojnë se deri më tani janë shoqëruar dhe marrë në pyetje 15 persona.
Përsa i përket dënimit të Tozajt, kohë më parë, bëhet fjalë për një ngjarje të ndodhur në vitin 2005, kur në pikën e kalimit kufitar të Kakavijës, forcat e policisë kanë arrestuar në flagrancë shtetasin Et’hem Danaj, pasi në mjetin kamion tip Volvo, u gjet e fshehur sasia prej 1146 kg lëndë narkotike e llojit “cannabis sativa”.
Për ngjarjen u arrestuan katër persona, midis tyre edhe Tozaj, i cili u dënua me 6 vite e 8 muaj burgim.
Çfarë deklaronte organi i akuzës në atë kohë:
…ka rezultuar e provuar se këta të pandehur në bashkëpunim me njëri tjetrin dhe me persona të tjerë kane realizuar eksportimin e sasisë 1146 kg lëndë narkotike “cannabis sativa” për në shtetin grek, ku:- I pandehuri Hasan Gjinaj ka qenë në rolin e organizatorit (duke bërë të mundur gjetjen e personit Et’hem Danaj që do të transportonte lëndën narkotike dhe që është arrestuar në flagrance si dhe ka shkuar më parë në shtetin grek që të priste lëndën narkotike), ndërsa te pandehurit Hasan Gjinaj dhe Xhafer, ndryshe Laver Tozaj, kanë qenë në rolin e ndihmësit në kryerjen e veprës penale, e konkretisht i pandehuri Xhafer ndryshe Laver Tozaj ka ndjekur dhe shoqëruar të gjykuarin Et’hem Danaj gjatë kohës që ky kryente transportin e lëndës narkotike, ndërsa i pandehuri Ardi Xhaferi ka bërë të mundur heqjen e kokës tërheqëse me të cilën është tërhequr trajleri që ka transportuar atë…kjo vepër ka mbetur në fazën e tentativës (ashtu siç ka konkluduar gjykata e shkallës së parë në vendim), pasi eksportimi i saj për në shtetin grek nuk është realizuar plotësisht, për arsye të pavarura nga vullneti i të pandehurve (kapja në flagrancë në pikën kufitare)./ Opinion.al
