Temperaturat e larta të ditëve të fundit dhe ekspozimi për një kohë të gjatë në diell kanë sjellë probleme të ndryshme te moshat e vogla. Sipas mjekëve pediatër, gjatë kësaj periudhe po dominojnë problemet e lëkurës dhe të syve.
“Problemi i parë që ne vëmë re në këtë periudhë janë dermatitet, pra kemi të bëjmë me irritimet e zonës së lëkurës, të cilat shoqërohen me probleme, përveç kruarjes te fëmijët, edhe me irritime në sy, me rrjedhje hundësh, kruarje në sy, të cilat futen e klasifikohen si konjunktivit,” u shpreh Anila Sevdari, mjeke pediatre.
Nëse këto probleme te fëmijët zgjasin dhe shoqërohen me temperaturë, duhet patjetër konsulta me specialistët për marrjen e mjekimit të duhur.
“Përveç kruarjes, fëmija fillon dhe bën temperaturë, pra kalon nga një dermatit i thjeshtë në ekzantemë virale disa ditore, që zgjat tre-katër ditë. Do të merren antipruritikë që janë për kruarjet, si dhe kremrat qetësues që janë me oksid zinku, të cilët qetësojnë lëkurën. Nëse kjo si diagnozë, pra përveç irritimit, zgjat me shenja shoqëruese si të vjella apo diarre, atëherë do të merret mjekim sipas simptomave që shfaqen,” shtoi Sevdari.
Për t’i bërë ballë vapës përvëluese dhe për të pasur një imunitet sa më të fortë, mjekët rekomandojnë konsumimin e sa më shumë lëngjeve dhe ushqimeve të shëndetshme për fëmijët.
“Sa më shumë lëngje për të pasur hidratim, për të mos pësuar dehidratim, dhe të kenë veshje normale, veshje pambuku, të lehta dhe të ruhen me kapele. Për sa i përket ushqimeve, do të doja shumë të theksoja të mos konsumojnë ushqime të fast food-it, ushqime të përpunuara dhe me yndyrë të theksuar, sepse nuk e ndihmojnë organizmin në këtë fazë.”
Duke qenë se jemi në periudhën e plazhit, specialistët theksojnë se duhet treguar sa më shumë kujdes që fëmijët të mos ekspozohen për një kohë të gjatë në diell dhe pa mbrojtje. Klan News
