Shoqata e Unifikuar e Eksportuesve Shqiptarë i ka dërguar një letër, Fondit Monetar Ndërkombëtar, Bankës Botërore dhe Bankës Europiane për Rindërtim dhe Zhvillim duke kërkuar asistencë për politikat monetare dhe fiskale që lehtësojnë goditjet nga kurset e këmbimit.
Në letër thuhet se rënia e monedhës europiane vjen si pasojë e parave të pista kryesisht në pasuritë e paluajtshme.
“Luhatjet e mëdha dhe të përkohshme që dëmtojnë rëndë eksportuesit dhe turizmin duket se ndikohen edhe nga paratë informale apo kriminale në ekonominë shqiptare, kryesisht në pasurinë e paluajtshme dhe bizneset fitimprurëse”, thuhet në letrën drejtuar FMN.
Duke theksuar se këto luhatje do të ndjehen edhe më shumë në vitet në vijim ata nënvizojnë se “e konsiderojmë se do të ishte shumë e vlefshme për të bashkuar forcat me ekspertët tuaj, për nxitjen dhe lehtësimin e politikave të eksportit, ku përfshihen politikat fiskale, ato monetare, por edhe rëndësia e reduktimit te kostove dhe te ngarkesave fiskale”.
