Prokuroria e Tiranës, do t’i kërkojë ndihmë autoriteteve gjermane, për të kryer analizat e gjakut të rreth 20 të lënduarve gjatë aktivitetit të Partisë Demokratike pranë Kryeministrisë.
Sipas akuzës, analizat do të dërgohen në Gjermani pasi Mjekësia Ligjore shqiptare nuk ka kapacitetin njerëzor dhe teknologjik për të kryer analizat e nevojshme që identifikojnë se çfarë kimikati është hedhur gjatë mitingut të opozitës. Kjo për faktin se kanë kaluar disa ditë dhe mjekësia ligjore e laboratori i Qendrës Spitalore Universitare nuk ka nxjerr përfundimet se cili është shkaku që çoj rreth 150 persona në ambientet spitalore për ndihmë pas mitingut të PD-së.
Nga ana tjetër, mësohet se laboratori i Forcave të Armatosura nuk ka kthyer përgjigje për matjen e ajrit dhe analizat e kryera në teren, pranë kryeministrisë. I vetmi fakt, që tashmë është konfirmuar nga Ushtria është se ekspertët nuk kanë gjetur mbetje radioaktive në rrobat e pjesëmarrësve në aktivitet të cilat janë sekuestruara apo edhe pranë kryeministrisë, raporton ABC NEWS.
Nga ana tjetër për llogari të këtij hetimi, mësohet se është pyetur drejtori i kompanisë së eventeve, në pronësi të cilit ishin prozhektorët dgjatë aktivitetit të opozitës. Burimet thonë se ai ka sqaruar se këto prozhektor janë përdorur edhe në aktivitetet të tjera të Partisë Socialiste e Lëvizjes Socialiste për Integrim dhe nuk ka pas asnjë reagim apo incident pas përfundimit të aktivitetit.
Sipas akuzës, janë sekuestruar me cilësinë e provës prozhektorët si dhe magazine ku mbahen këto ndriçues të cilët po ekzaminohen si dhe rrobat e disa prej të shtruarave në spital, të cilët i janë nënshtruar ekzainimit të laboratorit të policisë shkencore. Ende nuk ka një raport përfundimtar për rezultatet e këtij ekspertimi. Kjo ngjarje, që po hetohet nga prokuroria është regjistruar si vepër penale e “pengimit të subjekteve zgjedhore” të parashikuar në nenin 325 të Kodit Penal.
