Disa muaj më parë emisioni “Stop” në Tv Klan tregoi se si më 28 janar të vitit 2024 rreth orës 22:30 një çift të fejuarish po ktheheshin nga Përmeti në Gjirokastër me makinën e tyre tip “Golf”.
Fatos Kalemi dhe Alime Malka sapo kaluan Tepelenën, në afërsi të fshatit Mashkullorë u përplasën në korsinë e tyre nga një automjet tip “Benz”, që drejtohej nga 21-vjeçari Françesk Kaca. Nga ky aksident më shumë i dëmtuar mbeti Fatos Kalemi, pasi goditja ishte në krahun e shoferit.
Në këtë mënyrë, Françesku hyri në korsinë e tij dhe shkaktoi përplasjen. Këtë fakt e pranoi edhe vetë 21-vjeçari në momentin e aksidentit, kur tre të aksidentuarit po ndihmonin njëri-tjetrin. OPGJ i Policisë Rrugore Gjirokastër, Artan Tarka, i cili ka këqyrur vendin e aksidentit në një bisedë me çiftin denoncues, tha se përplasja ka ndodhur në korsinë e Fatosit për shkak të 21-vjecarit.
Por katër ekspertë, Andrea Baxheri, Arben Luzi, Fisnik Ziçishti dhe Naim Hoxha, kanë manipuluar provat, duke nxjerrë përgjegjës për aksidentin të dëmtuarin Fatos Kalemi.
Pas investigimit të emisionit “Stop” dhe kryerjes së eksperimentit u bë e mundur të hidhen poshtë konkluzionet e katër ekspertëve në dy aktekspertime, që hapur kishin ndryshuar dinamikën e aksidentit.
Ndaj prokuroria e Gjirokastrës vendosi, të bëjë një akt-ekspertimi të tretë me pesë ekspertë autoteknikë, të cilët gjithashtu nuk kanë dalë në të njëjtin konkluzion. Dy ekspertë kanë bërë aktin më vete dhe janë shprehur, siç ka ndodhur aksidenti, ndërsa tre të tjerët kanë bërë një tjetër akt dhe kanë manipuluar sërish dinamikën e ngjarjes.
Ish-prokurori Eugen Beçi tregon procedurën, lidhur me njoftimin që prokurori duhet t’u bëjë palëve për akt-ekspertimin. Nëse akti nuk u njoftohet palëve bashkë me emrat e ekspertëve, kjo procedurë quhet e pasaktë dhe lë hapësirë për ta ribërë atë./tvklan.al
