TIRANE – Një nxënës i shkollës së Baletit është kapur i armostur në ambientet pranë shkollës. Lajmi është mësuar nga Opinion.al përmes një denoncimi që ka bërë një qytetar. Ai shkruan se “tre ditë më parë tek Shkolla e Baletit një nxënës i klasës së 10-të ka qëlluar me armë tip pistoletë në afërsi të shkollës. Ai është arrestuar nga Komisariati nr.1, por Policia e Tiranës e ka mbajtur të fshehtë ngjarjen”. Pas këtij denoncimi, Opinion.al u interesua mbi këtë ngjarje dhe mësoi se ishte e vertetë.
Në përgjigje të interesimit tonë, zëdhënësi i policisë, Adrit Goxhaj dha versionin zyrtar të incidentit me armë pranë shkollës.
Sipas njoftimit zyrtar, i arrestuari është 17 vjeçari D. L. (atësia Dodë), banues në Tiranë. Ai është arrestuar rreth orës 13:00 të së mërkurës në rrugën ‘’Petro Nini Luarasi” ku ndodhet edhe shkolla.
Gjatë kontrollit, thotë policia, iu gjet një armë zjarri pistoletë “TT”, model 54, kalibër 7.62, me një krehër me 6 fishekë. Gjithashtu iu gjet dhe iu sekuestrua një thikë me teh metalik. Policia thotë se 17 vjeçari lëvizte me armë në brez. Materialet proçeduriale i kanë kaluar Prokurorinë.
Adoleshenti akuzohet për veprat penale të “Prodhimi dhe mbajtja pa leje e armëve luftarake dhe e municionit” dhe ” Prodhimi dhe mbajtja pa leje e armëve të ftohta”.
Siç shihet policia pranon se i arrestuari është nxënës i Shkollës së Baletit, madje thotë se ishte nxënës problematik, por nuk pranon se ai ka qëlluar me pistoletë. /Opinion.al
