Intervistoi Dritan Laci
Ishte kapiteni i Shqipërisë në dy ndeshjet e fundit të Shqipërisë në Europian dhe padyshim ky është plotësimi më i madh i një ëndrre që lojtar që mund të arrijë me Kombëtaren e tij, pas pjesëmarrjes në një kompeticion madhor siç është Kampionat Europian. Energjik, i palodhshëm në krahun e majtë të mbrojtes Kuqezi, Ansi Agolli është një nga emblemat e suksesit të tashëm të Kombëtares së Shqipërisë. I ndodhur bashkë me heronjtë e tjerë të kësaj Shqipërie në vendgrumbullimin e Kombëtares në Francë, në pritje të lajmeve të mira nga dy grupet e fundit në lojë, që mund të kualifikojnë Shqipërinë në fazën e 16 më të mirëve, Agolli na sjell për Opinion.al një panoramë të asaj që po ndodh me ekipin por edhe një përshkrim shumë interesant të karakteristikave të të gjithë Kuqezinjve që luajtën në këtë fazë të Francë 2016
Ansi përshendetje. Suksese për gjithçka keni arritur deri tani. Keni bërë një punë të shkëlqyer deri tani, por në futboll duhet edhe fat. Dje fati nuk ishte me Kombëtaren. Si ishte atmosfera në ekip pas mësimit të rezultateve të Gjermanisë dhe Turqisë?
Tani imagjinojeni vetë se si mund të jetë. Duke parë që nga ndeshja në ndeshje shanset sa vijnë dhe zvogëlohen. Megjithatë kemi dhe një shpresë të fundit në ndeshjet e sotme që të them të drejtën nuk kam shumë besim që do dalin në favorin tonë! Ne punën toë e kemi bërë, mbase mund të kishim marr edhe pak më shumë por futbolli ky është.
Në dy ndeshjet e fundit e fundit keni provuar shijen e Kapitenit të Kombëtares. Që për hir të së vërtetës është një nga nderimet dhe njëkohësisht përgjegjësitë më të mëdha që i bëhen një futbollisti në karrierën e tij. Cana është shprehur se do të largohet nga Kombëtarja, pas Europianit. Mendoni që ka ardhur momenti që ky shirit të kalojë në krahun tuaj?
Është trajneri ai që vendos për shiritin e kapitenit dhe jo mendimi im! Nuk besoj që është momenti tani të bëj plane për të ardhmen. unë mundohem të jap më të mirën në fushë, të ndihmoj shokët e mi në çdo situatë. Nuk mund ti fsheh emocionet si dhe përgjegjësinë që kam patur 2 ndeshjet e fundit që kam qenë kapiten i skuadrës por kam hyrë në fushë dhe jam munduar të bëj më të mirën ti shërbej sa më shumë skuadrës dhe shpresoj ta kem bëë mië.
Si mund ti përshkruani këto 13 ditë në Francë? Cilat janë kujtimet më të bukura, momentet pikante por edhe ato më të hidhura?
Janë ditët më magjike që një futbollist shqiptar ëndërron dhe për mua kështu ka qenë. Kam fituar një eksperiencë të çmueshme nga ky turne! Momenti më emocionues padyshim që ishte këndimi i himnit për herë të parë në europian në ndeshjen me Zvicrën, por gjithashtu edhe fishkëlllima përfundimtare në ndeshjen me Rumaninë. Më i vështiri padyshim ka qenë goli që morem me francen 1 mint para perfundimit te ndeshjes qe na këputi dhe moralisht por që fatmirësisht nuk ndikoi në përgatitjen e ndeshjes me Rumaninë!
Ju keni luajtur me disa trajnerë në Kombëtare. Çfarë mendoni se e dallon De Biasin nga trajnerët e mëparshëm?
Nuk mund të bëj krahasime, por ajo që mund të them është që De Biasi është një trajner detajesh. E shfrytëzon edhe centimetrin më të vogël të fushës. I jep rëndësi edhe detajit më të vogël, pastaj ka bërë një punë kolosale për ndryshimin e mentalitetit të skuadrës.
Si kapiten në dy ndeshjet e fundit jam i detyruar tju marr një opinion për kolegët në Kombëtare. Jo për notat në fushë, pasi atë e kanë vlerësuar kushdo që ju ka parë por për karakteristikat e tyre jashtë fushe.
Andi Lila?
Më emocionali. S’ka nevojë me pi Red bull!
Ergys Kaçe?
Më i ndrojturi!
Taulant Xhaka?
Më i qeshuri
Orges Shehi?
Më seriozi
Shkëlzen Gashi?
Topmodeli
Sokol Cikalleshi?
Reflekton qetësi!
Amir Abrashi?
Vrapon edhe kur të gjith janë ulur për të ngrënë !
Armando Sadiku?
Bërtet shumë, dëgjohet në çdo cep!
Frederic Veseli?
Veseli më i urti!
Elseid Hysaj?
Piston!
Etrit Berisha?
Psikolog!
Odise Roshi?
Shakaxhi, na mban gjallë?
Burim Kukeli?
Kirurg cezarian. I ftohtë. Akull!
Loriku?
Këtij s’kemi ç’ti themi. Ky është Kapiteni
Edhe diçka gjithmonë për pjesën pikante. Kush është lojtari që De Biasi i bërtet më shumë gjatë stërvitjes ose gjatë lojës?
Ergys Kaçe
Po e shara që De Biasi përdor më shumë?
Budalla! Dhe këtë e thotë shqip.
Edhe një pyetje që lidhet me karrierën tuaj personale. Sigurisht që Francë 2016, ështe një vitrinë e madhe për Kombëtaren dhe futbollistët e saj. A keni pasur oferta dhe a do të vazhdoni të luani akoma me ekipin tuaj në Azerbajxhan?
Unë kam një kontrate me ekipin edhe për 1 vit tjetër. Kam marrë oferta nga klube sidomos javën e fundit por unë ndihem mire aty ku jam. Luaj në një skuadër ku profesionalizmi është në nivelet maksimale ndaj dhe nuk e shoh të udhës të ndërroj skuadër. Ndihem mirë në Baku me skuadrën e Qarabag FC. Kam 6 vite aty dhe ky ekip është për mua shtëpia ime e dytë. Objektivat e kësaj skuadre janë që të luajmë në grupet e Champions League dhe unë do jap më të mirën për ta ndihmuar skuadrën!
