Për 90 minuta janë shitur të gjitha biletat e hedhura në qarkullim dhe që i përkasin ndeshjes së 7 majit, ku Leicester pret Everton në fushën e tij. Takim që mund t’i japë titullin kampion për të parën herë në histori ekipit të “dhelprave”.
Klubi ka nxjerrë një komunikatë se çmimet e biletave kanë qenë të njëjta me ndeshjet e tjera dhe se do të hedhë në gjyq këdo që i shet ato me çmime të larta.
Por kjo duket se nuk do të vlejë shumë, pasi çmimet kanë qenë vërtet të larta në tregun e zi, nga 3.800 euro deri në 18.700 euro. Një biletë që një tifoz do ta kujtojë gjatë, pasi mund t’i japë titullin kampion Leicester.
Mes personave që mëngjesin e sotëm ka qenë në radhë për një biletë për ndeshjen e 7 majit ndaj Everton ka qenë edhe kryetari i Bashkisë së Leicester, Peter Soulsby. Edhe ai, si të gjithë fansat e zjarrtë të skuadrës, ka qenë në radhë për të marrë biletën e tij, pasi është anëtar i “Family Fox”.
“Mbërrita në dyqanin ku shiteshin biletat në 7:40 të mëngjesit dhe që në atë orë radha ishte e madhe. Mes atyre që kisha pranë kujtoj një zotëri nga Ascot, që kishte lënë gruan në shtëpi duke bërë valixhen, ndërkohë që në mbrëmje do të shkonin për pushime në Barbados. Por kur mora biletën u largova i gëzuar…”, u shpreh Soulsby.
