Kryeministri Edi Rama në jo pak raste është gjendur në vështirësi kur është pyetur nga gazetarë të vendeve europiane për marrëdhënien e tij me Presidentin e Turqisë, Rexhep Taip Erdogan, por është krejt i relaksuar kur flet për të në agjencinë shtetërore të lajmeve turke, Anadolu Agency (AA).
Në intervistën e publikuar sot nga kjo agjenci, Rama ka folur për shumë çështje por edhe për marrëdhënien e tij me Erdoganin, për të cilin nuk heziton të thotë se e ka admiruar ende pa e njohur… Po sipas Ramës, Erdogani ka transformuar Stambollin dhe ka shërbyer si frymëzim për të, në kohën kur drejtonte Bashkinë e Tiranës.
E plotë deklarata e Ramës:
“Në politikë nuk ngelet gjë pa u komentuar dhe nëse merresh me politikë duhet të jesh i përgatitur që të gjendesh edhe përballë komentesh apo akuzash të cilat bazohen tek axhendet e atyre që komentojnë dhe akuzojnë, dhe jo te e vërteta. Marrëdhënia ime me presidentin (Erdoğan) është një marrëdhënie që ka nisur pa u njohur unë me të, pasi e kam admiruar për së largu punën e tij të jashtëzakonshme si kryetar i Bashkisë së Stambollit dhe rolin transformues që ai ka pasur dhe ka qenë një ndër shembujt që më kanë frymëzuar për atë që kam bërë për Tiranën. Pastaj kam pasur fatin të njihem me të ta vlerësoj së afërmi, një marrëdhënie që është e ngritur mbi respektin reciprok që nuk ka absolutisht asnjë nga ato shenja që shumëkush merr përsipër të ngrejë akuza dhe teori konspiracioni. Mbi të gjitha është një marrëdhënie e veçantë pasi bazohet tek një parim që nuk e gjen shpesh në marrëdhëniet politike dhe diplomatike që ‘po’ është ‘po’ dhe ‘jo’ është ‘jo'”.
