Kryeministri Edi Rama ka reaguar edhe njëherë tjetër për ligjin e importit të mbetjeve në Shqipëri, në përpjekje për të bindur opinionin publik pas kritikave të shumta ndaj tij dhe nismës që po ndërmerret anekënd vendit për të shkruar në kazanët e plehrave emrat e deputetëve.
Nëpërmjet një shënimi në facebook, Rama ka ofenduar shoqërinë civile duke i etiketuar si “sharlatanë politikë e mediatikë”.
Edhe njëherë tjetër, kryeministri mundohet të shpjegojë se në Shqipëri nuk do të vijnë lëndë të rrezikshme. Ai tha se nuk e ka tradhëtuar popullin me këtë ligj, pavarësisht, se tre vjet më parë ishte vetë Edi Rama që e kundërshtoi me të madhe ligjin e importit të plehrave në Shqipëri.
Shënimi i plotë:
Çfarë po u thuhet sot njerëzve nga sharlatanët politikë e mediatikë, për ligjin e ri të mbetjeve, është një shpifje që synon t’u fusë frikën dhe t’i përdorë kundër qeverisë!
Ne nuk i kemi tradhëtuar shqiptarët kur ndaluam importin e plehrave nga jashtë; nuk i kemi tradhëtuar kur kaluam ligjin e ri që s’ka të bëjë gjëkundi me lejimin e importit për plehra që digjen apo groposen në Shqipëri; nuk do t’i tradhëtojmë kurrë për asnjë interes që bie ndesh me interesin e tyre e të fëmijëve tanë!
Ligji i ri është vetëm normalizimi i jetës për industrinë e lehtë të riciklimit, 100% sipas legjislacionit të gjelbër të BE-së, e cila blen mbetje letre, plastike, alumini apo druri dhe i kthen në lëndë të parë për prodhimin e ambalazheve, shisheve plastike, kanaçeve të aluminit apo material bio për ngrohje (pelet).
Ishim vendi i vetëm në Europë pa këtë ligj dhe sot jemi thjesht një vend si të tjerët, në rajonin tonë apo në Bashkimin Europian.
