Vetëm para pak kohësh, kosovarja 19-vjeçare Imzela M., kishte përfunduar shkollën si asistente e farmacisë. Dhe për një moment e humbi jetën në vijat e këmbësorëve. Rreth orës 07.30 një pensionist 78-vjeçar e godet Imselën në vijat e këmbësorëve. Nga goditja e fortë, ajo u përplas në pjesën e djathtë të rrugës dhe ndërroi jetë në vendin e ngjarjes.
Imzela me familjen e saj jetonte vetëm 50 metra më larg, në një ndërtesë banimi.
Prindërit e saj kishin marrë rrugën e vendlindjes në Kosovë. “Sapo e morën vesh lajmin e kobshëm gjatë rrugës së gjatë, ata kthehen menjëherë dhe rreth mesnatës mbërrijnë në Zvicër. Vërtetë është e tmerrshme ajo që ka ndodhur», thotë një shoqe e Imzelës për “Blick“, shkruan “Zhurnal”.
Imzela punonte në një farmaci në Lozanë dhe që nga e enjtja kishte përfunduar shkollimin si asistente e farmacisë.
«Ishte shumë e lumtur që e kreu shkollimin, dëshironte të bënte edhe maturën, bënte orë me makinë dhe kënaqej kur e ngiste atë», vazhdon shoqja.
Policia tashmë është duke hetuar shkakun se përse plaku e goditi vajzën në zebrat e këmbësorëve. Atij i është konfiskuar menjëherë patenta e shoferit. «Plaku ka thënë se i ka penguar dielli», thotë një fqinj i cili kishte nxituar në vendin e aksidentit.
Tashmë, në vendngjarje janë vendosur lule e qirinj, në përkujtim të kosovares së re, që e humbi jetën tragjikisht, raporton “Zhurnal”.
