Mediat italiane vijojnë të publikojnë detaje nga dëshmia e Taulant Malaj, shqiptarit që vrau në Itali vajzën e tij 16-vjeçare dhe italianin, 51-vjeçar Massimo De Santis, të cilin e akuzon për marrëdhënie intime me bashkëshorten e tij.
45-vjeçari shqiptar ka rrëfyer detajet e ditëve të fundit, në të cilat është shtuar zemërimi ndaj 39-vjeçares dhe fqinjit, gjë që soli edhe tragjedinë.
Malaj u tha gjyqtarëve se kishte vëzhguar lëvizjet e gruas dhe ato që ai besonte se ishin takimet e dyshuara të gruas me të dashurin e saj përmes kamerave të shtëpisë.
Ai shtoi se ishte i sigurt se gruaja e tij kishte një lidhje jashtëmartesore që kishte më shumë se një vit dhe tha se disa takime mes të dyve i kishte regjistruar me celular.
“Unë e bëra videon pranë kufomave, nuk kishte asnjë arsye të veçantë. I regjistrova takimet e tyre, një ditë ai mori gruan time me makinë me Maserati. Pasi i vrava mora në telefon vëllain tim të cilit i thashë çfarë kisha bërë. Nuk erdhi menjëherë, kishte frikë, mbërriti pas ambulancës”, tha bukëpjekësi 45-vjeçar shqiptar.
Gjatë marrjes në pyetje ai tha se gruaja dhe fqinji ishin takuar pas një aksidenti automobilistik.
Sipas autorit të ngjarjes që atëherë ata filluan të bisedonin. Mësohet se Malaj i tha prokurorit se gruaja dhe shoku i tij hanë shpesh bashkë. I dyshuari kishte regjistruar edhe disa dreka mes të dyve me telefonin e tij celular.
Sa i takon të birit Leonardo, 5 vjeç, që ndodhej në shtëpi kur ndodhi masakra, 45-vjeçari tha: kur kuptova se çfarë kisha bërë, e mora atë në krahë./Opinion.al
