Janë sekuestruar pasuri të paluajtshme me vlerën 1 milion euro në Tiranë, që dyshohet se e kanë burimin nga trafikimi i drogës.
Në kuadër të operacionit “Villas” u bë e mundur ekzekutimi i vendimit të Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për vendosjen e sekuestros preventive ndaj pasurive të paluajtshme në emër të shtetasit Fran Merdhoçi, 57 vjeç dhe të familjarëve të tij.
Në zbatim të këtij vendimi, u bë sekuestrimi i pasurive të paluajtshme, konkretisht i 2 vilave në Dobresh, Tiranë, vlera e të cilave arrin rreth 1 milion euro.
“Nga veprimet hetimore dyshohet se pasuritë e sekuestruara e kanë burimin nga veprimtaritë kriminale të kryera nga shtetasi Fran Merdhoçi”, raporton policia.
Fran Merdhoçi është dënuar nga Gjykata e Tiranës me 10 vjet e 6 muaj burgim, për trafikim lëndësh narkotike, kryer ne bashkepunim.
57-vjeçari u arrestua në vitin 2019 pasi ishte shpallur në kërkim./Opinion.al
