Ish-presidenti Bujar Nishani e ka cilësuar një ekstremist politik, Ministrin e Brendshëm Sandër Lleshi, i zgjedhur nga Edi Rama pas dorëheqjes së Fatmir Xhafës.
Në emisionin “Kjo javë” të gazetares Nisida Tufa, Nishani u shpreh se sot nuk ka më rëndësi kush vendoset ministër, pasi ata trajtohen si zëdhënës shtypi.
“Ministrat sot trajnohen si zëdhënës shtypi. Nuk ka rëndësi kush vihet ministër. Personi konkret është një ekstremist politik. Nuk është më gjeneral. Kur ka pasur uniformë u angazhua në aktivitet politik të njëanshëm. Nuk ka fare rëndësi kush bëhet ministër, pasi ministrat rezultojnë të lidhur me krimin. Të dy ish ministrat kanë përfituar nga aktivitetet kriminale. Tashmë nuk ka asnjë vlerë sepse ka humbur çdo sens i besimit dhe i shpresës. Sa më parë qytetarët presin që t’i hapet rrugë shpresës. Lleshi ka fyer kushtetutën duke qenë me uniformë”, tha Nishani.
Kujtojmë se Bujar Nishani gjatë kohës së presidencës e liroi nga detyra Zëvendës Shefin e Shtabit të Ushtrisë, Gjernal Sandër Lleshi, ndërsa ky i fundit e dërgoi çështjen në gjykatë. Lidhur me këtë argument, Nishani tha: “Në Forcat e Aarmatosura”, ushtarakët shërbejnë brenda një termi të caktuar. Nëse nuk merr gradën e caktuar ti del në rezervë. Lleshi e mbylli fazën përkatëse dhe doli në rezervë sipas ligjit. Gjykata u mor me dekretin e presidentit”.
