Ministri i Brendshëm, Taulan Balla ka reaguar në lidhje me ngjarjen e rëndë të ndodhur në Kamëz, ku një 27-vjeçare ka vendosur t’i jap fund jetës së saj duke u hedhur nga lartësia për shkak se i kishin publikuar një foto intime në rrjetet sociale.
Balla thotë se i ka kërkuar Policisë së Shtetit të rrisin forcën zbuluese dhe reaguese për parandalimin dhe eliminimin e dhunës ndaj grave e vajzave.
Ndër të tjera ai shton se duhet të miratohen sa më shpejt ndryshimet ligjore në adresimin e rreziqeve të dhunës on-line.
“Policia e Shtetit ka identifikuar dhe ndaluar një person të dyshuar për shantazh dhe dhunë me bazë gjinore në rrjetet sociale me pasojë të rënda për jetën e një shtetasje. I kam kërkuar Policisë së Shtetit të rrisim forcën zbuluese dhe reaguese për parandalimin dhe eliminimin e dhunës ndaj grave e vajzave në të gjitha, e cila mbetet forma më e përhapur e shkeljes së të drejtave të njeriut në mbarë botën! Gjithashtu ndryshimet ligjore në adresimin e rreziqeve të dhunës on-line, duhet të konsultohen dhe miratohen sa më shpejt. #AsnjëJustifikim ndaj dhunës – as në shtëpi, as në vendin e punës, as në jetën publike, as online. Askund!”, thuhet në reagimin e ministrit Balla.
