DURRES- Pronari i një lokali në Gjirin e Lalzit mban të futur në kafazë të vegjël, të ngjashëm me kotecë dy arinj të murrmë, që fatkeqësisht në vendin tonë janë drejt zhdukjes.
Konstatimi është bërë nga aktivistë që merren me mbrojtjen e natyrës dhe kafshëve. Megjithëse kanë kaluar pothuajse dy muaj nga raportimi i tyre, deri tani asnjë masë konkrete nuk është marrë nga institucionet përgjegjëse për ruajtjen e faunës.
Ariu i murrmë është lloj i mbrojtur dhe aktualisht me statusin ‘i përkeqësuar deri në rrezik zhdukje’, për shkak të zvogëlimit në mënyrë drasike të popullatës së tij në vendin tonë. Ndërkohë që kanë nisur përpjekjet për bashkëpunim me palet përgjegjëse për konfiskimin e arinjve, njëri prej tyre është hequr që në fillim të muajit shkurt nga pronari i lokalit.
ASPBM, së bashku me Animal Rescue Albania, ka bërë raportimin e rastit pranë ISHMP/ Durrës.. Ndërkohë, të gjitha informacionet për dy arinjte i janë kaluar dhe Drejtorisë së Biodiversitetit, pranë Ministrisë së Mjedisit.
Aktualisht mendohet se në Shqipëri janë 90 arinj që mbahen nëpër kafaze, dhe megjithëse jemi i vetmi vend në rajon pa një qendër për strehimin e kafshëve në robëri, zgjidhje e vemte për raste të tilla është ndihma nga vendet fqinje ose të tjera, thonë përfaqësues të shoqatave.
