Këtë të enjte në emisionin “Rudina” në Tv Klan, do të rrëfejmë historinë e një djali 16-vjeçar, i cili sfidon autizmin e tij me pasionin për kitarën. Ai është Soirdio Balla!
Soirdio nuk flet shumë, por ama talentin e ka të madh. Kështu që për të treguar më tepër për të, ka qenë mamaja e tij, e cila u shpreh se në fillim, djalit të saj i pëlqente të vizatonte, por në kursin e pikturës, ai zbuloi dashurinë e dytë, kitarën.
Mirela Balla: Soirdios, kur ishte i vogël i pëlqente shumë të vizatojë në fakt. Edhe ne vendosëm që ta çojmë në një kurs për pikturë, që edhe të kalonte kohën, se vetëm terapi, terapi pa fund, thamë të argëtohet. Një ditë, në kursin e pikturës, aty në kurs pa një kitarë. E merr edhe i bie kështu kot, se nuk është se dinte. Dhe ai profesori thotë: “po ta provojmë njëherë në kitarë”. Soirdio, sa luajti profesori një pjesë, ky e kapi direkt pjesën. Direkt pas atij, i ra notave të kitarës.
Rudina Magjistari: Direkt?! Pa marrë asnjë mësim kitare më herët?
Mirela Balla: Absolutisht asnjë gjë.
Rudina Magjistari: E pabesueshme!
Mirela Balla: Edhe që në atë moment domethënë, profesori tha që: “ky ka shumë vesh muzike, se e kapi vetëm nëpërmjet tingujve, nëpërmjet gishtave. E kopjoi direkt pjesën”. Dhe nuk i është ndarë më kitarës. Sa pa atë siç e luajti profesori, ky e kopjoi.
Rudina Magjistari: E jashtëzakonshme ë, e jashtëzakonshme. Në fakt ne e dimë që fëmijët e spektrit autik e kanë një talent, një gjenialitet të tyren, që duhet ta zbulosh se ku e kanë edhe pastaj janë të mahnitshëm, të lënë pa fjalë me aftësitë e tyre të jashtëzakonshme. /tvklan.al
