E Ngarkuara me Punë e SHBA, Nancy VanHorn ka zhvilluar këtë të mërkurë një takim me kryetaren në detyrë të Apelit të GJKKO Saida Dollani.
Lajmi është bërë publik nga Ambasada Amerikane në Tiranë, përmes një postimi në rrjete sociale.
Në të thuhet se diplomatja amerikane shprehu mbështetjen për institucionet e drejtësisë ndërsa u shpreh se vendimet e gjyqtarëve janë jetikë për t’i dhënë fund mosndëshkimit.
“E Ngarkuara me Punë Nancy VanHorn u takua me kryetaren në detyrë të Gjykatës së Posaçme të Apelit kundër Korrupsionit dhe Krimit të Organizuar, gjyqtaren Saida Dollani. Znj. VanHorn ndau mbështetjen e palëkundur për gjyqtaren Dollani dhe kolegët e saj, të cilët shfaqin guxim të pamasë dhe sakrificë personale në luftën kundër korrupsionit dhe krimit të organizuar.
Vendimet e tyre janë jetike për t’i dhënë fund kulturës së mosndëshkimit në Shqipëri. Ambasada e SHBA mbetet e përkushtuar për të mbështetur institucionet e drejtësisë së Shqipërisë në misionin e tyre për të ruajtur drejtësinë dhe integritetin”, njofton ambasada.
