Një histori dashurie e nisur në Akademinë e Policisë, dy vite më parë, ka përfunduar në përndjekje.
Për këtë arsye, ditën e sotme, me urdhër të Prokurorisë së Krujës, Gjykata ka caktuar masën e sigurisë “arrest në burg” për Lumian Metën, një oficer i patrullës policore të Komisariatit Nr.1 në Tiranë.
Ai akuzohet për veprën penale të “Përndjekjes” në dëm të ish – të dashurës së tij, shtetases S. B, gjithashtu efektive policie në Komisariatin e Krujës.
Burime nga Prokuroria e Krujës bëjnë me dije se hetimet nisën në bazë të materialit referues të Shërbimit për Çështje të Brendshme, më datë 14.06.2016, nga ku rezultoi se i dyshuari nuk ka pranuar faktin e ndërprerjes së marrëdhënies intime me të dëmtuarën. Për këtë arsye, ai e ka përndjekur dhe ka ushtruar dhunë fizike ndaj saj në disa raste të përsëritura.
Historia e dashurisë mes dy oficerëve nisi në vitin 2014, gjatë studimeve në Akademinë e Policisë për të vijuar deri në Janar 2016. Në këtë kohë, e dëmtuara S.B. ka refuzuar të vijojë lidhjen intime, për shkak se, sipas saj, Meta ushtronte dhunë sistematike.
Prej Janarit 2016 e në vijim, oficeri i policisë e ka përndjekur, dhunuar dhe kërcënuar në mënyrë sistematike, me qëllim që lidhja e tyre të rifillonte. Vajza nuk ka pranuar në asnjë rast dhe kjo sjellje e ka shndërruar në objekt dhune nga ish – i dashuri.
Në disa raste, dhuna psikologjike ndaj të dëmtuarës ka ndodhur edhe në praninë e kolegëve të tjerë të policisë, thuhet në njoftimin e Prokurorisë.
Prokuroria e Krujës thotë se ka krijuar dyshime të arsyeshme se Lumian Meta ka konsumuar elementët e veprës penale “Përndjekja”. Për këtë arsye, nga ana e Prokurorisë së Krujës, u kërkua caktimin e masës së sigurisë “arrest në burg”, e cila u pranua nga Gjykata e Krujës dhe ai u arrestua mesditën e së mërkurës nga ana e oficerëve të Shërbimit të Çështjeve të Brendshme./tvklan.al
