Një i sapodiplomuar në Infermieri i ka dhënë një shumë prej 500 mijë lekësh të rinj një 46vjeçari, që i ka premtuar se do ta punësonte në Gardën e Republikës.
Ky i fundit i ka garantuar vend pune, me pretendimin se kishte njohje me komandantin e Gardës, pasi punonte në këtë institucion.
Është dashur të kalojnë disa muaj, që i riu të kuptonte se “miku” i tij nuk do ta punësonte dhe për më tepër, as nuk ishte punonjës i Gardës.
Pasi nuk ka marrë paratë e tij mbrapsht, i riu O.C. e ka paditur Besnik Feimin për “mashtrim”. Gjykata e Tiranës përfundoi pak ditë më parë gjykimin ndaj tij. Ai u deklarua i fajshëm për akuzën e “mashtrimit” dhe u dënua me 2 vjet e 6 muaj heqje lirie.
I pandehuri Feimi nuk do të qëndrojë në burg, pasi Gjykata vendosi përfundimisht lënien e tij në liri me kusht për një periudhë dyvjeçare.
Gjatë gjykimit i pandehuri ka pranuar se i ka marrë shumën e parave, por jo për ta punësuar kallëzuesin. Sipas Feimit, paratë ia ka marrë për të hapur një biznes dhe nuk ka pasur mundësi financiare për t’ia kthyer.
Referuar vendimit të Gjykatës, në kallëzimin e tij O.C. ka pretenduar se para dy vjetësh, kur punonte në një lokal poshtë shtëpisë së tij, është njohur me të pandehurin Besnik Feimi, të cilit i ka thënë se po kërkonte punë.
I pandehuri i ka thënë se punonte në Gardën e Republikës si shofer dhe se nisur nga njohja që kishte me komandantin e Gardës, mund ta rregullonte atë me punë si infermier, meqenëse shtetasi O.C. kishte mbaruar shkollën për të.
I pandehuri i ka thënë se duhej të paguante 500.000 lekë. O.C. ka pranuar pasi ishte nevojtar për punë dhe i ka dhënë të pandehurit shumën e kërkuar në muajin qershor 2014, së bashku me dokumentet personale. I pandehuri i ka marrë paratë dhe i ka thënë se do ta njoftonte.
Sipas kallëzimit, duke kaluar shumë kohë dhe i pandehuri nuk po e njoftonte për punësim, ka marrë në telefon të pandehurin.
Ai i ka thënë se njoftimi do t’i vinte me postë në shtëpi. Pasi ka kaluar shumë kohë, O.C. ka filluar të dyshojë dhe ka shkuar te Garda e Republikës, ka kontaktuar me informacionin dhe i ka kërkuar të njoftonte të pandehurin Besnik Feimi.
Aty ka mësuar se në Gardë nuk kishte asnjë të punësuar me këtë emër. Menjëherë ai ka marrë në telefon të pandehurin dhe i ka thënë, pse më ke gënjyer, ai i ka thënë se e bëra për të mirën tënde.
Më pas, O.C. i ka kërkuar të pandehurit Besnik Feimi të nënshkruante një deklaratë noteriale para noterit për njohjen e detyrimit financiar në shumën 500.000 lekë.
I pandehuri e ka nënshkruar deklaratën, por i është shmangur vazhdimisht kallëzuesit për kthimin e shumës. Në këto rrethana, O.C. është ndjerë i mashtruar dhe ka bërë kallëzim në Polici.
Gjatë dëshmisë së tij në sallën e gjyqit, O.C. ka sqaruar se i kishte dhënë 500 mijë lekë Besnik Feimit me premtimin se do ta ndihmonte për punë.
“Kemi lidhur një deklaratë noteriale ku ai e njeh këtë detyrim, por justifikohet se nuk ka mundësi financiare. Të gjitha këto justifikime, shmangiet e tij nga takimi, mbyllja e telefonit më kanë bërë të dyshoj se Besniku po më mashtronte”, është shprehur kallëzuesi./ Panorama.al
