Një 80-vjeçare e cila kërkohej nga familja e saj prej datës 30 Dhjetor është gjetur e mbytur në fshatin Liqenas në Pustec. Policia njofton se gruaja është gjetur mëngjesin e datës 2 Janar dhe se në trupin e saj nuk janë konstatuar shenja dhune.
Vajza e saj banuese në Greqi, kishte deklaruar në polici se nëna e saj ishte larguar nga banesa më 30 Dhjetor.
Njoftimi nga Policia
Më datë 02.01.2023, rreth orës 10:00, në fshatin Liqenas, Pustec, pranë molit është konstatuar e mbytur në ujë, shtetasja S. Sh., 80 vjeçe, banuese në Liqenas. Nga këqyrja paraprake e trupit të viktimës, nuk janë konstatuar shenja dhune.
Për shtetasen S. Sh., një ditë më parë, ka bërë kallëzim në Polici, vajza e saj shtetasja V. Sh., rezidente në Greqi, e cila ka deklaruar se nëna e saj ishte larguar nga banesa më datë 30.12.2022. Trupi i pajetë i 80-vjeçares, është nxjerrë nga uji dhe do të dërgohet pranë morgut të spitalit Korçë, për ekzaminime të mëtejshme.
Grupi hetimor po punon për sqarimin e plotë të rrethanave të ngjarjes. Materialet i kaluan Prokurorisë pranë Gjykatës së Shkallës së Parë Korçë, për veprime të mëtejshme.
