Spitali gjerman që po kuron liderin opozitar rus, Aleksei Navalny deklaroi se gjendja e kritikut të Kremlinit është “përmirësuar” dhe se ai është “duke iu përgjigjur stimujve verbalë”.
Spitali Charite në Berlin ka thënë përmes një deklarate të hënën se 44-vjeçari ka dalë “ nga koma e induktuar” dhe se “po largohet nga ventilimi mekanik”.
Megjithatë, spitali ka thënë se është shumë herët “për të vlerësuar efektet potenciale afatgjate të helmimit të tij të rëndë”.
Gjermania deklaroi se Navalny është helmuar në Siberi me agjent nervor të kategorisë ushtarake të periudhës sovjetike, Noviçok.
Navalny, politikan dhe hulumtues i korrupsionit, njëherësh një prej kritikëve më të mëdhenj të presidentit rus, Vladimir Putin, u helmua më 20 gusht në avion, teksa ka qenë duke udhëtuar nga Siberia në Moskë.
Avioni është detyruar të bëjë ulje emergjente në qytetin Omsk, në mënyrë që Navalny të dërgohet në spital. Pas spitalit siberian ku mori ndihmën e parë, ai u transferua në një spital në Berlin
Ivan Zhdanov, përkrahës i Navalnyt, ka thënë përmes një postimi në Twitter se agjenti nervor Noviçok mund të kontrollohet vetëm nga agjencitë ruse te inteligjencës, duke akuzuar ata për aktin e rëndë./Opinion.al
