Ministri i Drejtësisë Ylli Manjani ka qenë mbrëmë në qendër të lajmeve mbi një dorëheqje të mundshme. Dorëheqja ishte njoftuar nga disa media, madje ishte lidhur edhe me një konferencë shtypi të njoftuar nga Manjani për sot në ora 09:30.
Burime të Opinion.al kanë treguar se dorëheqja e Manjanit i është kërkuar Metës nga Rama për arsye të deklaratave të fundit të Manjanit në lidhje me mosarrestimin e Klemend Balilit dhe disa deklaratave të vazhdueshme ku është kritikuar Ministri i Brendshëm dhe performanca e qeverisë. Burime të besueshme sqarojnë se Meta nuk ka qenë kategorik për dorëheqjen e Manjanit, madje e ka konsideruar si një mundësi.
Me gjasë diçka ka lëvizur orët e fundit sepse 15 minuta më parë, burime pranë Manjanit kanë deklaruar për opinion.al se ai as ka dhënë dorëheqjen dhe as ka ndërmend ta bëjë një gjë të tillë. Sipas të njëjtave burime, Manjani nuk do largohet vullnetarisht nga qeveria. Nuk dihet nëse ky është edhe vendim i LSI, por me gjasë, edhe Meta është kundër dorëheqjes këtë moment.
Mbetet të shihet se cili do jetë reagimi i Kryeministrit. Opinion.al e kishte paralajmëruar një skenar të tillë të mundshëm që në editorialin e pasdites.
Po kështu pas lajmit në Opinion.al ka reaguar vetë Ylli Manjani. Përmes një statusi në facebook mbrëmjen vonë të se dieles shkruan:
“Miq e të njohur më informuan këtë mbrëmje të diele, që portalet kanë shkruar mbi dorëheqjen e më pas shkarkimin tim nga Qeveria. Këto lajme lidhen edhe me anulimin e një konference për shtyp timen.
Dëshiroj tu informoj se:
1. Nuk kam dhënë dorheqje nga detyra! Smë ka shkuar ndërmend një gjë e tillë!
2. Nuk kam asnjë njoftim zyrtar që të jem shkarkuar!
3. Konferencën për shtyp e kisha thirrur për të anoncuar paketën e ndryshimeve në legjislacionin Penal pas dakortësimeve që kam marrë nga kolegët e mi ministra dhe aktorë të tjerë të interesuar!
E anulova këtë gjë për arsye thjesht shëndetësore!”
