Turqia ka bërë me dije se është pranë identifikimit të autorit të sulmit, që u mori jetën 39 personavë shumë prej tyre shtetas të huja në një lokal në Stamboll, përgjatë natës së ndërrimit të vitit.
Shteti Islamik ka marrë përgjegjësinë për sulmin.
Zv/kryeministri turk, Numan Kurtulmus, tha për gazetarët se të hënën autoritetet kanë marrë shenjat e gishtave dhe një përshkrim të personit të armatosur.
Një imazh jo shumë i qartë i personit të dyshuar i nxjerrë nga kamerat e sigurisë u është dhënë të gjitha mediave turke.
Kurtulmus gjithashtu konfirmoi se tetë vetë janë marrë në pyetje në lidhje me sulmin vdekjeprurës.
Grupi militant, Shteti Islamik, mori përgjegjësinë për sulmin. Në një deklaratë grupi tha se sulmin e ka kryer “një ushtar i kalifatit”.
Sulmi filloi në orët e hershme të së dielës kur një person i armatosur vrau një oficer policie dhe një civil jashtë klubit Reina para se të hynte brenda.
Mbi 600 veta ishin në klub në atë kohë dhe disa prej tyre u hodhën në ujërat e Bosforit për t’u shpëtuar plumbave.
Klubi Reina në lagjen Ortakoy, një zonë në ngushticën e Bosforit është i njohur për praninë e personave të famshëm dhe të huajve, njofton VOA.
Autoritetet që janë vënë në kërkim të sulmuesit, thanë se ai mund të jetë përzier me njerëzit që iknin nga klubi. Përveç 39 të vrarëve, rreth 70 veta mbetën të plagosur.
