Takimi i shumëpërfolur mes kreut të opozitës dhe maxhorancës Lulzim Basha dhe Edi Ramës nuk ka pasur si pikë kryesore vetëm Reformën në Drejtësi, por edhe votimin elektronik.
Nga burime konfidenciale mësohet se PD-ja ka mbërritur në takim me një draft të parapërgatitur për votimin elektronik.
Vetë kreu i opozitës, Lulzim Basha ka deklaruar disa ditë më parë se zgjedhjet e lira dhe të ndershme janë prioritet mbi prioritetet për Partinë Demokratike.
Në këtë kuadër, Partia Demokratike ka hartuar një platformë mbështetur mbi parime dhe mbi zgjidhje europiane të cilat do të mundësojnë që vota e shqiptarëve të mos preket, që shqiptarët të votojnë të lirë, të paintimiduar.
“Çfarë do të bëjmë për zgjedhjet e ardhshme?! Votimi elektronik, pra me gishtërinj që të mos mbledhin kartat një natë para, të mos kërkojnë fotografi të votës. Çështjen e financimit: kemi një model i cili po të vihet në funksion ligjërisht gjurmon në çdo bankë të Shqipërisë lëvizjen e “cash”-it. Se ju e dini që tre-katër ditë përpara shkojnë e nxjerrin “cash”-in për të blerë vota”, deklaroi Basha disa ditë më parë nga Gjirokastra.
