Një makinë është hedhur në erë me lëndë plasëse në orët e para të mëngjesit në qytetin e Vlorës.
Ngjarja ka ndodhur pranë një pallati në lagjen “Pavarësia”, ku automjeti tip Audi-Q7, në pronësi të shtetasit Flamur Peçaj, 46-vjeç, ka marrë flakë e për pasojë është dëmtuar pjesa e përparme e tij.
Burime nga policia kanë bërë me dije se nga shpërthimi nuk ka të lënduar.
Sipas policisë dyshohet që mjeti mund të jetë djegur qëllimisht me një sasi të vogël të dyshuar lëndë plasëse, e cila është hedhur poshtë mjetit.
Ndërsa, po punohet për hetime të mëtejshme në lidhje me sqarimin e rrethanave të ngjarjes dhe për identifikimin e autorit.
46-vjeçari është një emër i njohur për autoritetet, pasi rezulton me precedentë penalë. Në vitin 2012, Peçaj është arrestuar nga Policia pasi ka kërcënuar dy vëllezër me armë zjarri.
Këta të fundit janë hakmarrë, duke e rrahur me sende të forta dhe me qytë armësh. Në atë kohë, ai përfundoi në spital për shkak të plagëve.
