Lulzim Bitri quhet 40-vjeçari nga Elbasani i cili është arrestuar në Tetovë të Maqedonisë, pasi u përfshi në një përplasje me armë në Tetovë dy ditë më parë. Lajmi konfirmohet për Gazeta Shqiptare, e cila shkruan se përleshja e armatosur ka ndodhur mes dy grupeve kriminale e si pasojë e të shtënave ka mbetur i vdekur në vend Naip Rexhepi.
Nga shkëmbimi i zjarrit dy të tjerë u plagosën mbrëmjen e të enjtes në Reçicë të Vogël, shumë pranë selisë së Bashkimit Demokratik për Integrim. Mbi 40-vjeçarin nga Elbasani rëndon akuza e vrasjes, e kryer në bashkëpunim. Po ashtu ndaj Lulzim Bitrit, që është lënë në paraburgim për 30 ditë sa të zhvillohen hetimet rëndon edhe akuza për mbajtjen e armëve të zjarrin dhe mjeteve shpërthyese.
