Prokuroria Shqiptare nis hetimet për të qartësuar situatën mbi përfshirjen e mundshme në çështjen “Panama Papers” të kompanive ose shtetasve shqiptare apo të huaj që operojnë në tregun financiar shqiptar.
Për këtë, organi i akuzës ka nisur kontaktet me institucionet e tjera ligjzbatuese.
Dy janë kompanitë shqiptarë që figurojnë në dosjet e skandalit financiar që po trondit botën. Njera prej tyre është kompania GFI, e cila zotëron koncesionin e markimit të karburanteve.
Ajo është në pronesi të biznesmenit izralit Asaf Halkin dhe shqiptarit Ismail Mulleti.
Mësohet se edhe Policia e Shtetit është duke grumbulluar informacione për bisnesmenin Ismail Mulleti dhe ortakët e tij, pas përmendjes së emrit të tij nga gazeta izraelite Haaretz.
Edhe politika ka kërkuar që të hidhet dritë mbi dy kompanitë shqiptare të përfshira në këtë aferë. Kreu i Grupit Parlamentar të LSI-së, Petrit Vaslili kërkoi nisjen e hetimeve.
Kryetarja e Autoritetit të Konkurencës, Lindita Lati u pyet për çështjen, në Komisonin Paralamentar të Ekonomisë. Ajo tha se ishin përpjekur të hetonin për GFI Albania, por pa mundur të zbulonin detaje nga llogaritë bankare, për shkak të pengesave ligjore.
Lati i kërkoi Komisionit të Ekonomisë që të marrë masa për të ndryshuar ligjin, në mënyrë që të lejojë këtë autoritet të hetojë burimin e të ardhurave të kompanive koncesionare në vend.
Nga dosjet voluminoze të publikuara nga Konsorciumi Ndërkombëtar i Gazetarëve Investigativë, nuk kanë dalë ende të dhëna të detajuara mbi dy kompanitë shqiptare. Nisja e hetimeve nga autoritetet shqiptare pritet të hedhë më shumë dritë mbi këtë aferë dhe sa të përfshira janë dy bizneset që operojnë në Shqipëri. /tv Klan
