Gjykata Kushtetuese rrëzoi kërkesën e Presidentit të Republikës, Bujar Nishani, për shfuqizimin si të papajtueshëm me Kushtetutën, të ligjit “Për trajtimin e pronës dhe përfundimin e procesit të kompensimit të pronave”, si dhe pezullimin e zbatimit të këtij ligji.
Gjatë seancës së sotme në Kushtetuese, përfaqësuesi i Partisë Demokratike, deputeti Oerd Bylykbashi theksoi se ligji parashikon vetëm kompensim fizik dhe se nuk e njeh konceptin e kthimit të pronës. “Ligji i ri nuk e njeh konceptin e kthimit të pronës. Ligji e kthen pronën në kohën e komunizmit.”, tha Bylykbashi.
Ligji i ri i pronave ka nisur të funksionojë, pas miratimit nga qeveria të fondit prej 24 milionë dollarësh për kompensimin e pronave të pronarëve. Presidenti i Republikës, Bujar Nishani, nuk e dekretoi këtë ligj duke ia kthyer mbrapsht Kuvendit, ndërsa iu drejtua edhe Gjykatës Kushtetuese duke kërkuar shfuqizimin e tij.
Për vonesat e kësaj gjykate për të shqyrtuar këtë kërkesë, Presidenti Nishani i justifikoi me presionin që qeveria po bën ndaj saj për të mos e pezulluar zbatimin e ligjit.
“Presidenti i Republikës shpreh shqetësimin e thellë për presionin publik adresuar sot pasdite nga ana e qeverisë shqiptare ndaj Gjykatës Kushtetuese të Republikës, në lidhje me shqyrtimin e ligjit për kthimin dhe kompensimin e pronave. Presioni politik i një qeverie ndaj Gjykatës Kushtetuese të vendit është një akt i paprecedentë në historinë e pluralizmit shqiptar”, reagoi Presidenti i Republikës.
