Kryeministri Edi Rama është parë pasditen e sotme në selinë e Presidencës. Takimi mes Ramës dhe Metës ka pak minuta që ka nisur dhe vjen në kulmin e debatit për plotfuqishmërinë e negociatave mes Shqipërisë dhe Greqisë për çështjen e kufirit detar.
Presidenti Meta ka refuzuar dy herë kërkesën e ministrit Bushati, duke kërkuar informacione tjera të hollësishme që nisin me saktësimin e titullit, paraqitjen e një analize të brendshme tekniko-ligjore dhe plotësimin kuadrit legjislativ nëse ka mangësi. Po ashtu kërkohet që grupi të mos ulet në negociata pa hartat e duhura dhe dokumentacionin mbështetës.
Më 2 mars, Meta priti në Presidencë të gjithë anëtarët e Komisionit të Jashtëm, të cilët dolën prej andej me një mendje. Të gjithë i dhanë te drejtë këmbënguljes së Presidencës ndaj Ministrisë së Jashtme.
Ndërsa sot paradite, Meta teksa ishte në një aktivitet për 7 Marsin tha se do të presë kohën e duhur për ti dhënë OK negociatave.
