Gjykata e Apelit ka vendosur që të kthejë Haki Çakon në detyrën e Drejtorit të Përgjithshëm të Policisë, pas pezullimit që ju bë për llogari të organit të akuzës, që e ka marrë në hetim për atë që njihet si skandali i pajisjes së përgjimit. Seanca u mbajt me kërkesë të vetë Çakos ndërsa gjykata vlerësoi se nuk ka vepër penale.
Trupa gjykuese përbërë nga Marie Qiriazi dhe anëtarët Fiqirete Mullai dhe Ervin Metalla ka vendosur në favor të kryepolicit, duke rrezuar vendimin e shkallës së parë, që vendosi pezullimin e tij nga detyra. Sipas avokatit mbrojtës të Çakos, Maks Haxhia, Apeli vlerësoi se “nuk ka dyshime të arsyeshme që ka vepër penale”. Sipas tij, që nga ky moment, Çako mund të kthehet në detyrë.
Kreu i Policisë, Haki Çako apeloi vendimin më 9 qershor, tri ditë pas shpalljes së vendimit nga gjyqtari Arjan Aliaj. Nga ana e prokurorisë, drejtori i Përgjithshëm i Policisë së Shtetit ka dhënë deklarata të ndryshme në tre raste të marrjes në pyetje, me shkrim dhe me gojë. Ndërkohë që Çako pretendon se nuk ka dijeni për kohën se kur ka kaluar në doganën shqiptare aparatura e përgjimit.
