Mjafton pak që Xhani De Biazi të përbëjë lajm, edhe kur realisht ai nuk e kërkon një gjë të tillë. E keni parasysh telekomedinë shqiptare të fillimviteve ‘90, ku biznesmeni i huaj u thotë shqiptarëve të varfër: A mërziteni t’u jap ca dollarë? Kështu ka ndodhur sot me trajnerin e Shqipërisë, i cili duke folur në lidhje telefonike me emisionin ‘Radio Anch’io lo Sport’ në Radio Rai 1, u pyet: Po sikur ta kërkonte Anglia, tani që Roj Hoxhson dha dorëheqjen? E pritshme përgjigja e De Biazit: “Normale që ekziston mundësia, edhe pse nuk e di sa reale janë shanset që Anglia të mendojë edhe për emrin tim. Gjithsesi, nuk do të refuzoja, sepse kam një klauzolë që më lejon të prish kontratën me Shqipërinë, edhe pse është e qartë që kam krijuar lidhje të forta me këtë vend dhe nuk e kam të lehtë të largohem”. Stoli i Italisë ishte pranë: “Po, isha shumë pranë dhe do të më pëlqente, nuk mund të gënjej. Një italian dëshiron gjithnjë të drejtojë kombëtaren e vet dhe besoj se tani kam eksperiencën e mjaftueshme për ta bërë në të ardhmen”.
“Axurrët” po shkëlqejnë në Euro 2016: “Italia u nis mes shumë dyshimesh, por tani po bën gjëra të mëdha falë aftësisë për të luajtur si skuadër. Të shpresojmë që ta bëjë edhe kundër Gjermanisë. Diferencën do ta bëjë Konte, mënyra e tij e të përgatiturit të ndeshjeve. Këta lojtarë ndoshta nuk janë më të mirët në absolut, por së bashku formojnë një skuadër të fortë, një kolektiv që nuk mendon në nivel individual, por vetëm për të mirën e përbashkët, ndaj u bëj komplimente”.
