Persona të armatosur dhe ende të paidentifikuar kanë qëlluar me armë drejt një punishteje në Shënkoll të Elbasanit dhe për pasojë kanë mbetur të plagosur dy vëllezër.
Policia tha se vëllezërit G.B, 60 vjeç dhe A.B, 49 vjeç banues në Elbasan janë dërguar për ndihmë mjekësore në spitalin Kirurgjik Elbasan dhe ndodhen, jashtë rrezikut për jetën.
“Nga veprimet e para hetimore të kryera nga shërbimet e policisë rezultoi se persona të paidentifikuar dyshohet të kenë qëlluar me armë zjarri në drejtim të dy vëllezërve të cilët kanë qenë duke punuar në punishte”, thuhet në komunikatën e policisë.
Vëllezërit janë plagosur lehtë jo nga plumbat por gjatë tentativës për ti shpëtuar të shtënave me armë zjarri, duke u përplasur me sendet që ndodheshin brenda punishtes.
Grupi hetimor vijon hetimet për sqarimin e rrethanave dhe dokumentimin e plotë të ngjarjes dhe ende nuk ka asnjë pistë për motivet e sulmit në biznesin e tyre. /Opinion.al
