Me urdhër të prokurorisë sot janë arrestuar dy zyrtarë të Autoritet të Rrugëve në varësi të Ministrisë së Transporteve. Ata dyshohet se nuk kanë zbatuar projektin e rrugës “Golem Plepa” si pasojë e të cilit humbën jetën në aksident dy fëmijë të mitur. Burimet thonë se priten dhe arrestime të tjera.
Bib Gjokmarkaj me detyrë drejtor rajonal i ASHR është njëri prej të ndaluarve.
Dritan Fejzo me detyrë, shef i zyrës Juridike në ASHR është i ndaluari i dytë.
Sipas prokurorisë dy zyrtarët e ASHR-së akuzohen për shpërdorim detyre.
Mungesa e barrierave mbrojtëse të rrugës Plepa-Golem u bë shkak për humbjen e dy jetëve të shtunën, 7 Maj. Dy fëmijët e mitur 3 dhe 5 vjeç udhëtonin me nënën e tyre kur makina doli nga rruga. Ekspertët rrugorë thanë nëse do të ishin barrierat aksidenti do të ishte pa pasoja fatale.
Barrierat dyshohet se u hoqën për të favorizuar karburantin e Pilo Kerit. Ky e fundit është babai i Krislen Kerit, drejtor kabineti në Ministrinë e Transporteve që ka në varësi ASHR-në.
Firma ndërtuese e rrugës i kishte vendosur në fillim barrierat por me vendim të gjykatës së Shkallës së Parë Kavajë ato u hoqën, duke i dhënë të drejtë pronarit të karburantit.
Por ky vendim i Shkallës së Parë u rrëzua në Apel në 2014. Pra Autoritetit të Rrugëve iu dha e drejta nga Gjykata e Apelit ti vendoste barrierat mbrojtëse të rrugës. ASHR e drejtuar nga Dashamir Xhika nuk e zbatoi vendimin e gjykatës së Apelit.
