Një rast i pazakontë vjen nga qarku i Fierit, ku një shtetase e moshuar, e moshës 101-vjeçare dëshiron të ushtrojë të drejtën e saj për të votuar, por deri më tani nuk i është mundësuar.
Arsyeja përse ka ndodhur kjo vjen pasi e moshuara, F.Nuhaj, nuk e gjen emrin e saj në listën për të votuar, raporton gazetarja Anila Sefa. Për personat mbi këtë moshë, ndiqet një procedurë e veçuar, të cilët duhet të paraqiten në zyrat e gjendjes civile për t’u përfshirë në lista.
I biri i të moshuarës, I.Nuhaj, kërkon zgjidhje që nëna e tij të mund të ushtrojë të drejtën e saj për të votuar.
“Erdhi për të votuar që në orën 7 të mëngjesit, tek shkolla Naim Frashëri, nuk e ka emrin në asnjë vend thanë. Ma bënë të ç’regjistruar në një kohë kur ajo është gjallë dhe për këtë po ngre shqetësimin. Vajta në gjykatë duhet të vesh tek gjendja civile më thanë për të marrë një vërtetim atje që figuron në qendrën e votimit. Punonjësja nuk ishte atje, tani po bredh. Mua më vjen keq për atë plakën, që dua ta gëzoj, edhe s’po e gjej mundësinë. Ngela, u dorëzova”, tha Nuhaj për gazetarët.
/tvklan.al
