Gazeta britanike ‘The Telegraph’ mbështetur mbi dëshmitë e një miku të xhihadistit John, për një revistë të përmuajshme të shtetit islamik Dar al-Islam pretendon se 2 xhihadistët kanë qëndruar 2 javë në Tiranë përpara se të mbërrinin në Siri.
Në rrëfimin e xhihadistit shpjegohet se si dy të rinjtë, që rezultonin në listat e personave më të kërkuar, kanë mundur të përshkojnë Europën me pasaportat e tyre britanike, duke ua hedhur më së miri shërbimeve inteligjente, përpara se të mbërrinin në Siri.
Fytyra gjysmë e mbuluar e të ashtuquajturit xhihadisi John u bë e njohur në gjithë botën si njeriu që priste kokat e perëndimorëve.
Pjesë e udhëtimit të tyre mësohet se ka qenë edhe Tirana, ku ata kanë mbërritur përmes një avioni nga Franca.
Xhihadisti ka rrëfyer se kur mbërritën në aeroport, në sportel e kishin pyetur se përse kishte ardhur në Shqipëri dhe ata ishin përgjigjur se ishin këtu transit pasi destinacioni i tyre ishte Greqia.
Pasi kishin qëndruar 2 javë në Tiranë, ata kishin udhëtuar në mënyrë ilegale deri në Kastoria, Greqi e më pas në Selanik dhe që andej, përmes një varke kishin mbërritur në Turqi.
Xhelati i Shtetit Islamik, emri i vërtetë i të cilit ishte Mohamed Emwazi, është vrarë në një sulm amerikan kundër xhihadistëve në Raka, në Siri, 13 nëntorin e shkuar sipas burimeve nga Britania dhe Pentagoni.
Ai ishte shte një nga njerëzit më të kërkuar në botë, që kur u shfaq për herë të parë në video në gusht 2014 për të njoftuar ekzekutimin me prerje të kokës të gazetarit amerikan James Foley.
Më pas vijuan video me vrasjen makabre të një tjetër gazetari amerikan, Steven Sotloff, e punonjësit amerikan Abdul-Rahman Kassig, e britanikëve David Haines e Alan Henning dhe të gazetarit japonez Kenji Goto. Emwazi më pas u shndërrua në objektiv të shërbimeve sekrete dhe të sulmeve të forcave amerikane në Siri.
*Itenerari i xhihadisteve
