Me tonelata drogë u kapën në Greqi pak ditë më parë dhe policia e shtetit fqinj njoftoi se është kapur grupi më i madh i narkotrafikëve në Ballkan. Sot dalin fakte të reja: Koka e këtij trafiku, sipas gazetës së njohur greke Kathimirini, është një shqiptar. Emri i tij ende nuk është bërë publik, por mësohet se është 44 vjeç dhe ka mbajtur një post të rëndësishëm në Shqipëri. “Ka qenë zyrtar dhe ka mbikëqyrur çështjen e transportit bregdetar në Sarandë. Madje ai ka qenë i akuzuar edhe nga opozita shqiptare në vitin 2014”, shkruan gazeta greke.
Vendet ku kishte aktivitet ky grup ishin Greqia, Shqipëria, Bullgaria, Spanja, Holanda, Britania, Austria, Belgjika dhe Norvegjia . Policia greke thotë se droga nisej për në Greqi me skafe nga Shqipëria dhe më pas shpërndahen në Evropë nëpërmjet një kompanie kamionësh false me bazë në Greqi.
