Babai i Elidona Demirajt, që u vra nga i shoqi në Angli ka apeluar për zbardhjen e ngjarjes dhe sjelljen e trupit të së bijës në atdhe.
Përmes një statusi në Facebook, Halil Demiraj kërkon që autoritetet shqiptare të ndërhyjnë në këtë çështje.
“Pres me padurim ardhjen e trupit të pajetë të vajzës time në shtepi dhe zbardhjen sa më parë të çështjes nga drejtesia angleze dhe për këte kërkoj ndihmen e te gjithë atyre qe mund te kontribuojnë ne këte çeshtje, përfshi këtu edhe shtetin shqiptar dhe drejtësine shqiptare që çeshtja te trajtohet me drejtësine qe i takon” shkruan ai në profilin e tij në Facebook.
Ai shkruan se përvec sa ka rrëfyer, nuk di asgjë tjetër se si kanë rrjedhur ngjarjet që u pasuan me vrasjen e së bijës, për të cilën akuzon dhëndrin e tij. Sipas tij, ajo u vra pasi dëgjoi një bisedë që ndoshta nuk duhej ta dëgjonte dhe pas kësaj i shoqi e njoftoi me telefon se do të divorcoheshin.
Pas një pajtimi, që sipas babait mund të ishte edhe nën presion, ditën që do ndërronin banesë, ai nuk ka mundur të flasë më me të bijën, deri sa mori lajmin e tmerrshëm për vrasjen e saj nga burri, Lulzim Qeleposhi, i njohur dhe si Arben Rexha.
