Gjovalin Guri, është personi i shpallur në kërkim nga policia e Shkodrës, pasi akuzohet për vrasjen xhaxhait Zef Guri dhe plagosjes së djalit të xhaxhait Gjin Guri, ngjarje e ndodhur në aksin Shosh-Kir në Dukagjin më 27 shtator.
Nga arratia ai ka folur për mediat, duke mohuar akuzat e ngirtura ndaj tij. Ai pretendon se nuk ka patur konflikte me xhaxhain e tij, pasi policia argumeton dyshimet e saj se mes viktimës dhe Gjovalinit ka patur një konflikt për shfrytëzimin e një hapësire pyjore.
I dyshuari thotë se prej 12 vitesh nuk merret më me shfrytëzimin e pyllit. Para dy vitesh Gjovalin Guri u akuzua për kultivimin kanabisi, por edhe për ato akuza thotë se është i pafajshëm. Prej asokohe vijon që të jetë në kërkim nga policia.
Vrasja e xhaxhait Zef Guri dhe plagosja e djalit të xhaxhait Gjin Guri është një tjetër çështje që tashmë sipas policisë rëndon mbi Gjovalinin, gjë e cila bën që 40-vjeçari të mos dorëzohet nga frika e padrejtësisë.
I dyshuari ka vetëm një kërkesë për shtetin shqiptar që të bëhet drejtësi dhe të hiqen akuzat ndaj tij sepse pretendon se është i pafajshëm qoftë për vrasjen por edhe për kanabisin, ndërsa rrëfen edhe jetën e vështirë në arrati prej dy vitesh.
40-vjeçari bën apel që policia të gjejë autorët e vërtetë. Policia vendore e Shkodrës deri më tani nuk ka prova konkrete lidhur me vrasjen e Zef Gurit dhe plagosjen e djalit të tij Gjin Guri.
Arsyeja e shpalljes në kërkim të Gjovalin Gurit, kushëri i parë i të dëmtuarve lidhet vetëm me një debat që mendohet se vijon prej vitesh mes tyre për shfrytëzimin e një hapësire pyjore në njësinë Shosh të Dukagjinit, gjë e cila hidhet poshtë nga 40-vjeçari i dyshuar.
