Policia e Shkodrës ka arrestuar një 51-vjeçar, pasi ka tentuar të fusë ilegalisht 680,595 Euro në Shqipëri përmes doganës së Muriqanit.
Sipas uniformave blu mësohet se paratë e padeklaruara ishin fshehur në dy ndarje anësore të modifikuara të një furgoni që drejtohej nga 51-vjeçari.
Dyshohet që shuma e konsiderueshme e parave cash ta ketë burimin nga aktivitetet kriminale.
“Si rezultat i administrimit të menjëhershëm të informacionit të siguruar nga Drejtoria e Përgjithshme e Policisë së Shtetit, shërbimet e Policisë Kufitare të PKK Muriqan, në bashkëpunim me shërbimet e Drejtorisë Vendore të Policisë Shkodër, finalizuan operacionin policor të koduar “Burimi”.
Gjatë operacionit, u kap në hyrje të Shqipërisë dhe u arrestua shtetasi L. N., 51 vjeç, banues në Fushë Milot.
Nga kontrollet në vijë të dytë, në automjetin që drejtonte ky shtetas, u gjetën në 2 hapësira të modifikuara në dyert e pasme, 680 595 euro, të cilat ky shtetas synonte t’i fuste ilegalisht në Shqipëri. Vijojnë hetimet për të provuar burimin e parave”, njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme./Opinion.al
